感謝kap期待

寫tī第23屆世界台語文化營結束後

台灣羅馬字協會理事長

Tiuⁿ, Ho̍k Chû (張復聚)

tojhokchu@gmail.com

第23屆世界台語文化營(簡稱台文營)，已經tī 2019年8月27 Lomita ê南灣台灣基督長老教會完滿結束！真感謝濟濟國內外鄉親ê鼓勵，督促、支持kap鬥相共，mā感受tio̍h大家對台灣母語ê疼惜，對咱ê母語文化猶原是chiah-ni̍h死忠koh熱phut-phut！

台語文運動tī 1970年代就已經開始！台文營上早是1995 年台灣獨立建國聯盟美國本部蔡正隆主席 tī 美國 Houston 辦 ê 北美台語文夏令會。 蔡主席覺悟家己是”母語青盲牛”，認定beh建國bē當無台灣母語文化！

自2001年TLH (Tâi-oân Lô-má-jī Hia̍p-hōe台灣羅馬字協會)成立了後台文營就sóa轉來台灣舉辦，而且一直lóng是TLH負責辦理。Chit中間2003年因為中國肺炎，就是SARS，有停一屆。台文營一直lóng是大人參加，目的是hō͘台語文運動界朋友有聚會ê機會kap叫醒台灣人ê母語意識！過去40外冬大家認真拚勢ta̍uh-ta̍uh-á有hō͘政府看--著！對2001年開始tī國小教台灣母語，所pái咱mā須要辦理大人lia̍h外ê營隊。因為按呢TLH才tī 2008年koh開始辦高中生台文營、2012年koh有囡仔營！

但是，TLH是民間社團，無啥物資源，欠錢koh欠人！一年冬beh辦理chit 3款營隊，確實足chia̍h-lat！所pái今年(2019)決議kan-ta辦高中生kap囡仔營，台文營停辦。無phah-sǹg ，4月底美國ê鄉親強烈建議TLH今年ài繼續辦台文營，koh是去美國辦！時間是8月25到27，chhun無4個月thang準備！鄭良光先生koh真あっさり講經費方面若是文化部補助款若無夠，伊beh負責募款！實在hō͘人足感動！阮經過網路臨時理事會討論得著大家同意！Chhân-chhân tāu-koaⁿ kā chhiat gō͘-kak，chhūn-pān-sí--ê chiū kā liâu--lo̍h-khì！對5--月開始備辦chit-ê台文營。   

Chit-pái來參加ê人除了台語文先進同志掠外，上蓋特別--ê是，有8位40歲以下ê少年人對台灣kap Canada來參加！感謝陳文成基金會提供全額補助。

這是TLH頭擺去海外辦理台文營。好佳chài有真濟個人、單位kap團體熱情贊助kap鬥相共營隊才有才調sūn-sī圓滿達成任務！

Tī chia 大大感謝美國台文通訊kap加拿大Toronto台灣語文中心提供全面tek幫贊、美國光鹽基金會為咱備辦營隊ê伙食及歡迎晚宴、美國陳文成教授紀念基金會補助、

40歲以下少年人去美國開會、南灣台灣基督長老教會免費提供場所koh動員會友鬥腳手、白鴒鷥團契kap台灣歌仔戲班劇團為晚會提供精彩ê節目、美國台灣人聯合基金會提供財務及文化交流公共關係ê協助、南加州台灣人教授協會協辦！當然咱mā ài感謝鄭良光先生提供真濟經費kap夫人Christine’s 創意表演藝術工作室為咱做報名接待工作及籌備晚會節目。

Koh有，公共電視台語台台長呂東熹先生不但親身出席報告台語台現況kap展望，koh派2位記者專程報導！

感謝台灣文化部補助台灣參加者部份ê旅費kap部長鄭麗君有製作video kā咱祝福。

上尾就是特別感謝蔡英文總統tī足無閒ê工作中koh撥工製作錄影片kā咱肯定kap鼓勵。

這擺台文營hō͘我上大ê感想是：少年人已經開始teh關心台灣母語滅絕問題，tī台灣有、tī海外mā有！Chit-má 有愈來愈濟ê少年爸母開始覺醒beh全部使用台灣母語！這是咱進前m̄-bat想--過、m̄-bat 拄--過、 mā m̄-bat看--過ê歷史場景！咱應該按怎看待chit-ê現象、按怎對應chit款機緣、應該做啥物來鬥相共？不管按怎講，少年人才是決定台灣母語前途ê主角，咱進前拍拚40外年ê粒積mā是ài 靠in 來thn̂g-thòaⁿ(傳湠)！

Tī 母語滅絕危機隨時到臨ê 眼時前，tī母語繼續teh弱化 ê台灣，咱已經有爭取著《國家語言發展法》kap公共電視台語台ê初步成績。但是咱應該思考按怎好好á把握這款時機，鬥陣來保存，koh活kap發展 (Preservation, Revitalization and Development) 台灣母語，這lóng是咱ài繼續拚落去ê khang-khòe！

期待台灣母語CTT（chhut-thâu-thiⁿ）！