咱敢有法度想像，有一工台語會當有專門的法令來保障權益，有家己的電視台通傳播？敢有法度想像政府的公文書、國立的各類博物館攏會當用台語？對國小到高中攏有台語課，嘛鼓勵各科用台語進行教學？總統、文化部長、教育部長佇家己的FB鼓勵民眾講台語、參觀台語文的園區？敢會當想像政府設立專責機構來做台語資料庫、固定時間進行語言使用狀況調查？敢會當想像政府固定時間就舉行「國家語言發展會議」，向全民報告語言復振的狀況；佇行政院內面設立國家語言小組，討論語言復振的事工，koh佇公部門的會議內面，公平對待台語的使用？
頂面講的進展，攏是這馬的現況，抑是佇1年內會發生的改變(國、高中必修這馬教育部已經積極leh進行相關配套的規劃，按照法規，會佇2022年開始全面實施)。Tsia改變，攏是對2016年開始發生的。佇he進前，台語文運動經歷過一段真烏暗的日子……。
代誌愛對蔣偉寧做教育部長講起。Hit時阮(和周清玉前縣長、鄭正煜前社長)招一大陣人(包括幾nā位立委)，紮40幾位立委的聯署書去揣蔣偉寧部長，爭取本土語文教育正常化。Hit時阮提出的訴求之一，是將台語文的預算對hit時的2千外萬，恢復杜正勝部長時代的5千萬 – 這是我思考政府本土語文預算的開始。自按呢，我去查客委會、原民會的預算。做出對照圖通予社會/政府清楚看出台語文受著的無公平對待。Hit時，李勤岸教授和廖瑞銘教授嘛定佇演講的時，講台語是「上蓋弱勢的多數語言」。
台語文正式進入體制
久長、穩定的保障 – 國家語言發展法
一、想法
佇2015-2016這2年內面，我佇大部分的演講內面，定定攏會講著台語的三欠 – 欠資源，欠機關，欠法令。除了講著客語有客委會的支持，客委會一年27, 28億的預算；原住民族語有原民會的支持，原民會一年76, 77億的預算。台語的預算一年kan-na教育部的4千外萬niâ，連人的lân-san iù-á攏無夠以外，koh進一步分析欠資源的原因 – 中央無機關嘛，hit時我的ppt除了預算的對照表，koh有一張對照表 – 中央本土各語言的上懸組織：客語是「行政院下面的客委會」；原民語是「行政院下面的原民會」。台語是「行政院下面的教育部下面的終身教育司下面的第四科下面的2个科員(這2个koh毋是專門做台語業務的，是”部分”做台語業務的)」。按呢就算政府想欲撥預算，嘛毋知欲按怎撥 – 一个科是會當有jōa濟預算!?
Koh深入思考台語無專責機關的原因，其實就是無相關法規嘛！客語有「客家基本法」，所以政府就會當遵照法令，組織客家委員會；原住民語有「原住民基本法」，所以政府嘛會當遵照法令，組織原住民委員會。台語leh？台語hit時上懸的法規，是教育部的一寡行政命令 – 親像「支援人員聘任辦法」hit類的。所以正經講嘛無法度去設立專責單位1。
因為這三項大欠缺一个牽連一个，無解決法令，就袂有專責單位；無專責單位，就袂有資源，所以若無對法令解決，台語運動永遠kan-na會當偎靠「政府相關單位的善意」 -- 有關係的人leh執政就有，無關係的人執政就無；今年有，明年無一定有。Hit時鄭正煜社長講這叫做「做乞食共人分」。Hit陣我去演講攏講leh遮，ná講ná想辦法解決2。
二、母語聯盟
母語聯盟的創立者是李勤岸教授。聯盟佇2010年2月21成立。2014年因為勤岸教授的熱情邀請，我加入聯盟並且擔任第三屆、第四屆的理事長。自按呢，用母語聯盟做平台，阮一陣人開始研究國家語言發展法的可能性。
事實上，國家語言發展法頭擺提出，毋是hit時，佇2001年的時，教育部就bat研議《語言平等法》，並且佇2003年02月提出25條的版本。後來主管機關轉予文建會(文化部的前身)繼續推sak。總是攏因為社會氛圍和立法院支持的人數較少，一直無法度順利通過。
Tann 2016年的局勢也無仝，所以一方面阮利用聯盟做平台，邀請台中教育大學方耀乾主任做伙，雙邊合辦三場的workshop，邀請施正鋒教授、張學謙教授，和彼時猶是民進黨客家部主任的楊長鎮主任來做專題分享，分享早期in推sak國家語言發展法(語言平等法)的初衷kap困難，並且提出這遍beh推sak的具體建議。彼時濟濟支持台語文的友志 – 周前縣長、豐惠姊、(鄭福田基金會)慧珠姐、為文兄、學謙兄、培德兄、...等等，攏真熱情參與討論。逐家佇2016年4月提出聯盟的共識版，攏總簡簡單單13條，誠做未來推動的根據。Hit時逐家無想著未來的局勢會變kah對台語運動tsiah有利，所以擬的時真保守。想袂到後來正經通過的版本，內容koh比一開始民間所想的較豐富真濟，這真正是阮遮長期做台語運動的人想袂到的 – 毋koh這也是後話囉。
聯盟的版本決定了後，就是分頭遊說立委。Hit時一方面因為母語聯盟拄請17位立委合拍一支支持母語的影片「台灣母語新時代」囥去youtube，一方面我進前佇智庫嘛有聯絡幾位支持的立委，加上管碧玲…等等一寡委員，進前就有提出過/想欲提出家己版本的國家語言發展法，加上周前縣長的個人影響力，這遍的遊說真順利，有幾位立委(管碧玲、黃國書…等等)和時代力量黨團，攏用母語聯盟的共識版做基礎，做小幅度修改，提出家己版本的國家語言發展法。
三、文化部的支持
這時koh拄著問題：立委提案了後，愛有行政機關的對案，也就是講，法案愛有主管機關，決定啥物單位來擔這個責任。阮本底想講語言復振上主要的是佇教育方面，所以就由我去和教育部聯絡，請in擔任國家語言發展法的主管機關。聯絡的結果，教育部認為國家語言若限定佇教育，按呢格局傷細，而且進前的語言平等法也早就由文建會擔任主管機關，所以建議我先問文化部看覓，共教育部當作第二選擇。
Hit時的鄭麗君部長拄接文化部長。佇伊欲接任進前，阮幾個朋友去拜訪伊，建議伊用hit時立委的身分，請文化部家己清查過去幾年所推行/進行，和本土語文相關的政策。過一段時間結果出來，逐家會當想像he成果 – 真正是無幾項。Koh大部分攏是和原住民語相關的，幾年來文化部的施政內面，和台語有關係的，5支指頭仔攏算會出來。一個國家的文化部，竟然長期以來攏無本土語言相關的作為，咱著知影這是jōa 譀的代誌。所以鄭部長上台以後，開始大力推行本土語文的工課。
文化部一聽我講，koh看著民間逐家已經做的努力和成果，隨答應欲做國家語言發展法的主管機關，提出對案。而且鄭部長隨佇人文司下面設立「國家語言發展科」 -- 這個科初期上重要的任務就是完成國家語言發展法立法。
自按呢，關關難過關關過，行政院送出去，立法院拖；等到一讀送出去，委員會拖；委員會送出去，二讀/三讀拖。拖就愛koh想辦法解決中hng的問題；這中hng會當講每一步攏行kah真辛苦，若無政府機關的支持和濟濟朋友的做伙拍拚，國家語言發展法一定到tann猶是一場夢3。
最後，國家語言發展法佇2018年12月通過立法院三讀，2019年1月初9經過總統頒布，正式成為國家法令。施行細節也佇今(2019)年7月初9如期公布，予台語復振正式進入體制，成做「政府逐年攏應該愛編列預算、愛執行」的任務。台語文也按呢，正式脫離愛靠政府「善意」的乞食身分。
國家語言發展法(包括施行細則)內面的規定其實真完整，會當講共咱台語人的理想內面，目前用法律規範會著koh做得到的大方向攏包佇內面。這是台語文運動重要的里程碑。
未來發展
按照已經通過的「國家語言發展法」和「國家語言發展法施行細則」，政府未來對本土語文的政策大概的面貌會生做下面按呢。若是順利(明年的選舉是毋是會順利？選後相關部會的人事是毋是會順利？)，遮的規劃看起來應該佇1年內大部分攏會當實現：
1.行政院
行政院內面有一个「文化會報」，由文化部主持，負責協調各部會文化相關的業務。按照「國家語言發展法施行細節」，文化會報內面愛設立「國家語言小組」，負責討論整體的國家語言相關政策kap施行(簡單講，就是幫助協調各部會，予各部會的語言政策一致。
2.文化部
文化部身為國家語言發展法的主管機關，按照國家語語言發展法和施行細節的規定，應該(1)定期召開國家語言發展會議，向全民報告國家語言發展狀況和未來規劃 (2)成立國家語言發展中心，負責國家語言發展相關事務 (3) 定期調查國家語言保存和復振的狀況 (4)採取各種必要的措施，復振國家語言。
3.公廣集團：公視台語台目前屬佇公廣集團內面的公共電視。未來幾年，政府猶原有編列預算，目前的目標是佇2年後設立南部中心。另外，一定愛予「公共媒體法」緊通過，台語台的預算才真正會當得著保障！
4.教育部
教育部的任務，按照國家語言發展法的規定，就是(1)佇2022年開始(111學年度)，予本土語文佇國、高中列入部定課程 – 這內面包括總綱的修訂(決定本土語文時數 – 目前的規劃是國中三年全部必修，高一/高二必修(看學校，總是若是kan-na高一必修，高二愛有配套措施)，高三選修)，領綱的規劃(一般高中、綜合高中、技術高中的台語課上的應該攏愛無仝)，師資的養成(大學端敢有夠額的台語教授，通培育國高中的老師? 國高中現職老師按怎培養第二專長(台語)? 支援老師按怎補修中教的教育學分？未來的師培生按怎養成國高中教台語的專長？)，教科書和補充教材的編輯……等等。 (2)按怎佇各級教育鼓勵本土語文沉浸式教學 (3)佇「實驗教育三法」通過以後，按怎鼓勵「全台語學校」成立和經營 (4)補助各種幫助台語教育(國教/高教/社會教育)的想法，予遮想法落實。
目前教育部內面有一个「本土語文推動會」，大會由部長擔任主席(潘部長真要意本土語文，逐擺攏親身參加，決議嘛攏隨指示相關單位處理)，半年召開一擺。大會進前koh有4組的小組會議，先討論各種議題。這是教育部推動本土語文的「腦」。
另外，潘部長佇終身教育司內面設一个「本土語文辦公室」，由第四科的科長兼辦公室主任，負責推動本土語文的實務工作，會當講是本土語文佇教育部的「跤手」。
5.內政部/交通部
內政部愛佇地名標示本土語文，交通部愛予路名/交通工具的播音標示本土語文。總是現階段全面改變衝擊傷大，暫時佇台語的部分，tng開始leh規劃的，是「英譯發音」的部分，也就是講「沙鹿」的英譯，會當翻作「sua-lak」，毋是「Sha-lu」。目前內政部已經共教育部討羅馬字發音對照表，嘛已經委託台大的團隊對台北的地名開始調查起。明年結案了後，會先囥佇內政部的「地名資訊服務網」內面。
6.外交部
外交部愛開放人名用本土語文標示。總是護照是世界共同的資料庫，若是亂去就麻煩(親像遺產繼承，若是長輩用的姓的音譯和勢細無仝，時到恐驚無法度繼承)。所以雖罔外交部目前確實有leh考慮，總是猶無明確的辦法出來。
咱會當做的：
1.敦促政府，穩固現有成果
明(2019)年就beh選舉，選舉的結果目前無明朗。選後的政府人事布局當然猶有真大的變數。所以咱這馬愛共發展法內面的規定攏總真正提起來 – 國家語言發展會議, 國家語言發展中心, 公共媒體法……另外，一定愛想辦法(聯合立法委員)敦促政府相關部會，予in會當佇年底以前，將遮事項作kah「無法度退轉去」(irreversible)，確保袂因為明年選舉的結果影響咱過去這段時間得著的成果。
2.佇民間創作氛圍 – 氛圍若到，啥物攏真oh；氛圍若無到，sak啥攏真困難。所以咱愛佇各行各業、各種無仝的領域，盡量使用台語，創造社會氛圍。予社會感受著台語的價值kap活力。
3.佇創造社會氛圍的仝時，咱嘛愛理解，真濟語言的問題beh解決攏需要一步一步來，毋是隨會當100%解決的。 -- 香港這遍的抗議有一段話講了真好，意思是講，衝組的莫嫌「和理非」傷nńg-chiáⁿ；主張和平理性非暴力的，嘛莫嫌衝組的傷過頭hiông。按呢才會當團結目標一致的朋友，力量才會大。無，連邊隨著去予人分化/急破矣！
---------------------------------------
---------------------------------------
1.彼時有朋友主張按照進前杜正勝部長共「國語推行委員會」提來做本土語文推行的單位仝款。這確實是一个可行的方法，總是按呢成立的單位一來kan-na是「任務編組」，毋是真正穩定的單位，隨時喝beh無就會無去；二來預算無穩定，歹做久長的規劃。這kan-na會當算是「臨時」的辦法niâ
2.我印象真深是有一擺民進黨台灣智庫的一位要員邀請我去智庫演講，討論台語政策的種種問題kap未來規劃。Hit日我其實是感冒kah真嚴重 – 發燒，畏寒、一直咳嗽，規个人真艱苦。總是這是重要的機會，有幾惹个立委辦公室嘛攏會派人來聽。所以我就拖病去講，對現行種種語文相關法規到政府各單位的職權(和本土語文相關和會當做的部分)，一直到預算規模和未來的可能性。了後我koh去有幾擺去智庫講相關議題，總是這擺予我的印象上深。
3.這其中上捷佇關鍵時刻出手解決問題的人物，就是阮4人(鄭麗君部長、柯建銘總召、周清玉前縣長和我)。另外，方耀乾教授佇國家語言發展法的法案內容修訂，嘛仝款扮演重要的腳色；教育部潘文忠部長佇教育相關條文的配合，予法案上大的爭議 – 國、高中必修本土語文，無造成法案通過過程的阻礙，也是真大的關鍵。
總是當然佇這過程中台語文的友志 – 張復聚社長、蔣為文教授、張學謙教授、李勤岸教授、林修澈教授、陳豐惠老師、邱慧珠執行長…koh有其他真濟友志的堅定支持和出力，攏是這遍成功的必要條件。若無逐家的共同出力，kan-na靠某一、二个人代誌絕對袂成。會當講這遍的立法是台語界大團結的成果。
沒有留言:
張貼留言