李江却台語文教基金會（以下簡稱：基金會）是解嚴以後真重要ê「台語文教」社團，自1997年立案到今，持續發行台語文月刊，舉辦阿却賞－台語論文kap台語文學獎勵，鼓勵濟濟台語後輩；Koh舉辦台灣母語詩人大會－詩行、世界母語日活動等。Tī其他ê台語文活動內底，mā不時有基金會ê參與。Ē-tàng講tī解嚴後ê台語文運動內底，基金會扮演重要kap積極ê角色，負擔「開墾、掖種、生湠」ê責任。基金會成立了後，用專業者團體運作結合社會資源長期發行月刊，計畫tek累積台語文ê人才kap成果，得著社會ê疼惜，koh有李樹全先生提供工作空間，林皙陽董事長盡心力khêng錢銀，濟濟民間有志無私奉獻，chiah thang順利運作，造就濟濟台語文ê事工kap人才，ē-sái講台灣社運上堅定ê團體之一。以下先簡介基本資料：
【創會由來】
李江却女士1926年出世tī桃園大溪ê作穡人家庭，嫁翁李樹全先生，建置一个樸實ê家。李江却女士1990年3--月過身，查某囝李秀卿kap囝婿林皙陽捐款創設本會。
【宗 旨】
恢復台灣各族群語言ê性命；提倡發展台灣各族群母語文學kap文化。
【工作計畫】
推展台灣各族群語文全面使用、創作、翻譯、研究、教學、傳播、傳承ê相關活動。
【具體事工】
發行台語文月刊
《台文通訊》1991年7--月tī美國Los Angeles創刊，當原初ê發行人兼總編輯是鄭良光，後--來編輯工作uì L.A.徙去Hawai’i，尾--à徙去加拿大Toronto，2011年遷轉來台灣，歷任總編輯有李勤岸、蘇正玄、張秀滿、葉國基、廖瑞銘等。《台文通訊》是海外台語文學運動上重要ê刊物。鄭良光tī創刊號用「火母」款式ê會號講chit份刊物tio̍h扮演「火母」ê角色來thn̂g台灣語文ê香火。伊ê宗旨是chhui廣台語白話字、台語書寫hām台灣語言ê民族主體意識，文字用漢羅lām寫為主。1992年底tī台灣成立「台灣總連絡處」，由陳豐惠做台灣總連絡人。《台文通訊》間接促成國內專業文學雜誌《台文BONG報》ê設立。1997年，《台文通訊》ê台灣發行工作交基金會負責，2011年，編輯mā移交hō͘基金會處理，2012年有得著國立台灣文學館「全國優良文學雜誌補助」。
《台文BONG報》（以下簡稱《BONG報》）是一份追求台語文學化ê 專業雜誌，1996年10--月創刊，一月日出一期，強調「專業、文學、活潑」，題材包含詩、文、小說、劇本等等（台語以外，mā收客語、原住民語作品）。《BONG報》ê創刊kap《台文通訊》台灣讀者聯誼會有關係，tī海外設立ê《台文通訊》hō͘台灣ê母語運動者看著ài有一个hō͘國內文學創作者發表ê平台ê需要；自án-ne，《台文通訊》台北讀者聯誼會轉型ê台文寫作會創立《台文BONG報》。《BONG報》歷任總編輯有：陳明仁、陳豐惠、劉杰岳、陳德樺kap廖瑞銘。2012年2--月開始，伊kap《台文通訊》合刊koh改版發行《台文通訊BONG報》。改版了有彩色冊皮，頁數增加，是目前teh發行ê台文雜誌歷史上久長--ê。
阿却賞
Che是歷史上頭一个常態性ê台語文學獎項，1998年創立獎項ê時，號做「第一屆李江却台文獎」，2003年了後開始逐年舉辦。Chit个獎項專門鼓勵台語文學創作，培養出幾若个台文創作ê新作者，了後，文學創作以外mā兼鼓勵用台文寫論文ê學生，獎項hùn大叫做「阿却賞台語文學創作暨研究論文獎勵金」，chit款性質ê學術獎項，阿却賞mā是第一个，所致無論是獎勵台語文學創作ia̍h是台語學術研究，阿却賞lóng是先行者，是有歷史性、指標性ê重要獎項。就親像阿却賞宗旨所講--ê，tī短期是beh透過無仝類別ê母語文學作品、研究論文ê公開徵選，chhui動民間母語文學創作hām母語相關學術研究ê風潮；長期來講，ǹg望透過逐年定期ê獎勵，thang kā母語文學ê讀者群hùn大，sak起台灣在地多語文學創作、研究ê風氣。2015-2017年換獎勵囡仔故事繪本出版，目前有出《暗mi-moo》《來𨑨迌》《Tsiâ偷食菜頭粿？！》三本，iáu有三本籌備中。
台語文讀冊會
《台文通訊》台北讀者聯誼會tī 1996年轉型做台文寫作會，目前是邱文錫老師teh chhōa頭，用台語文讀冊會ê方式進行，主要唸讀kap討論《台文通訊》《台文BONG報》《台文通訊BONG報》，mā接受成員作品發表kap討論，逐禮拜一暗七點半tī基金會台北辦公室聚會。《台文通訊》彰化讀者聯誼會自1993年成立到今iáu繼續聚會，逐個月第三禮拜五暗時聚集，除了固定讀台語文作品，mā tiāⁿ邀請外賓用台語探討逐款議題。另外，2006年受基金會出版ê《虱目仔ê滋味－－清文台語小說集》吸引，由高雄謝一麟召集ê虱目仔讀冊會tùi chit本小說讀起，參加者多數是二三十歲ê少年家，in透過網路相招讀小說學台語，做伙分享學習；目前固定逐個月上尾一个禮拜日暗時tī三餘書店聚會。
世界母語日活動
世界ê語言直直teh消失，聯合國教科文組織（UNESCO）tī 1999年提倡逐年ê 2月21做「世界母語日」，總--是tī一般人無要意母語死活ê台灣，無論政府ia̍h民間，chhím開始lóng無chùn-būn--著；基金會為著beh叫醒母語意識、chhui-sak母語復振，ùi 2008年起tī 2月21前後舉辦「世界母語日活動」。到今bat舉辦過「囡仔台語講古競賽」（2008-2009）、，《2009年台灣母語人權觀察報告座談會》（2010），2011年kap三重社區大學合作，投入社區新劇劇團培訓，目今，由基金會董事陳明仁指導ê李江却三重社大台語戲行已經tī北部公演幾若擺。2012、2013年舉辦藝文節活動，2014年kap「哲學星期五」社群合作舉辦六場「講母語，久久久－世界母語日座談」。
詩行
自2008年開始舉辦母語詩公開發表ê活動，透過詩人吟家己ê詩，分享創作歷程hō͘一般大眾有機會接觸母語創作。2008-2010年tī台北、台中kap台南舉辦，2011-2013年tī國立台灣文學館擴大舉辦。詩行邀請--ê m̄-nā前輩，koh特別邀請少年輩新人，hō͘逐家熟sāi，mā鼓勵少年輩繼續創作。基金會kā逐冬大會ê詩作出版專冊，koh tī專業錄音室製作，逐冬ê《詩行－年度台灣母語詩人大會集》mā是當年度受注目ê出版品。
台語sa攏有講座
（2016年8--月起，逐個月第一个拜三暗時舉辦）
台語輸入法研習
（2018-2019年舉辦十場）
台語文出版品
文學作品出版是保存kap chhui廣ê重要手段，雖然母語文學kap教學是小眾--ê，m̄-koh基金會無惜本錢，除了定期刊物ê編輯發行，mā投入母語文學kap教材ê出版；除了逐冬ê《阿却賞tio̍h獎作品集》、雜誌合訂本參《詩行－年度台灣母語詩人大會集》，koh出版其他專冊，有《A-chhûn－陳明仁ê短篇小說集》、《路樹下ê tō͘-peh-á－陳明仁台語小說劇本集》、《虱目仔ê滋味－清文台語小說集》、《台灣人寫真―台文BONG報散文精選輯》、《台文BONG報小說精選輯》、《台文通訊BONG報年度選》、《倒轉―Voyu Taokara Lâu台語小說集》、《無影無跡－藍春瑞台語小說集》、《Thá-kheh－林貴龍台語文學作品集》、《2013阿却賞台語文學作品集》、前台大語言所張裕宏教授編ê《萬國通用拼音－台語白話字手冊》等等。基金會mā承辦國立台灣文學館《愛．疼．惜－2008台語文學展專輯》hām《98年教育部台灣閩客語文學獎作品集》ê編輯。
協辦其他台語文出版事工
2000年以後，mā積極協助其他團體ê台語文出版事工，包含長老教會台灣族群母語推行委員會ê《白話字基礎教材》、《吳翠瓊牧師ê台語囡仔古》、《相招來學白話字》，長老教會教育委員會ê《美好腳蹤》系列、《大手牽小手－兒童聖經故事》系列，台灣羅馬字協會ê《伊索寓言台語版》、《阿鳳姨ê五度ê空間》，台語傳播公司ê《台灣字ABC》《胡蠅蠓仔大戰歌》（月琴唸歌配2D動畫），彰化縣賴許柔文教基金會ê《台灣俗語鹹酸甜》、《歡歡喜喜教台語》、《阿爸ê鹿角薰吹》，半線文教基金會ê《輕輕鬆鬆讀台語》，台灣教師聯盟ê《林萬寧老師紀念文集》，台北縣新埔國小ê《台灣囡仔歌、俗諺》、日本明日香出版社ê台灣語會話教材系列，立言出版社《悅讀台灣》小說繪本系列，夾腳拖劇團囡仔故事《蛇郎君來了》CD；Mā長期協助台灣聯合國協進會通訊、《新使者》、《小羊》等雜誌ê台語文專欄。
協辦「全民台語認證」
2001年以後，民間社團開始串聯「全民台語檢定聯盟」籌備全民台語認證，基金會董事、tī成大台灣文學系教冊ê蔣為文積極kho͘一个團隊，2010年正式tī成大文學院內底設「台灣語文測驗中心」，是全國第一个專業台語文認證常態性機構。基金會全力支援這个事工；中心有出版《全民台語認證導論》、《全民台語認證語詞分級寶典》參考冊。
協助公共電視製作台語文單元、擔任戲劇kap音樂台語指導
2011年起kap公共電視新聞部合作製作「看世事講台語」單元，提供新聞題頭台譯、諺語資料kap台文字幕ê服務，上網做台語文推廣、台語文教育資源。2011年年底起，基金會koh協助新單元「記憶／技藝101」，內容記錄民間傳統技藝，提供口白台譯、台文字幕製作ê服務。Che是台灣第一擺有電視台ê專題節目全面採用台文字幕。2005年起開始擔任戲劇台語指導（包含舞台劇、電視劇kap電影），kap周美玲、黃玉珊、陳麗貴、陳育青、吳汰紝、楊雅喆、魏德聖、馬志翔、葉天倫、許明淳、陳彥達、楊景翔、吳易蓁等導演合作過，台譯劇本iah教演員台語，mā有支持大學生搬台語劇；另外，mā協助閃靈樂團、拷秋勤樂團、董事長樂團、滅火器樂團、夕陽武士樂團、農村武裝青年等等專輯台語歌詞文字校正。
製作「空中台語教室」教學短片上網，協助製作民視台灣學堂「講台語當著時」「台語講世事」、公視「正káng」等等節目，擔任公視台語台「全家有智慧」「旺來西瓜仙拚仙」節目顧問。
催生「國家語言發展法」kap公共電視台語台、協助公共電視台語台揣人才kap顧問
李江却台語文教基金會網站：www.tgb.org.tw
台北辦公室（李根塗無償提供）：台北市萬華區中華路一段106號9樓，02-2311-2199。
高雄辦公室（陳凱和無償提供）：高雄市苓雅區仁智街106巷2號6樓之3，07-334-8080。
沒有留言:
張貼留言