李江却台語文教基金會（以下簡稱：基金會）是解嚴以後真重要ê「台語文教」社團，自1997年立案到今，持續發行台語文月刊，舉辦阿却賞－台語論文kap台語文學獎勵，鼓勵濟濟台語後輩；Koh舉辦台灣母語詩人大會－詩行、世界母語日活動等。Tī其他ê台語文活動內底，mā不時有基金會ê參與。Ē-tàng講tī解嚴後ê台語文運動內底，基金會扮演重要kap積極ê角色，負擔「開墾、掖種、生湠」ê責任。基金會成立了後，用專業者團體運作結合社會資源長期發行月刊，計畫tek累積台語文ê人才kap成果，得著社會ê疼惜，koh有李樹全先生提供工作空間，林皙陽董事長盡心力khêng錢銀，濟濟民間有志無私奉獻，chiah thang順利運作，造就濟濟台語文ê事工kap人才，ē-sái講台灣社運上堅定ê團體之一。以下先簡介基本資料：
【創會由來】
李江却女士1926年出世tī桃園大溪ê作穡人家庭，嫁翁李樹全先生，建置一个樸實ê家。李江却女士1990年3--月過身，查某囝李秀卿kap囝婿林皙陽捐款創設本會。
【宗 旨】
恢復台灣各族群語言ê性命；提倡發展台灣各族群母語文學kap文化。
【工作計畫】
推展台灣各族群語文全面使用、創作、翻譯、研究、教學、傳播、傳承ê相關活動。
【具體事工】
發行台語文月刊
《台文通訊》1991年7--月tī美國Los Angeles創刊，當原初ê發行人兼總編輯是鄭良光，後--來編輯工作uì L.A.徙去Hawai’i，尾--à徙去加拿大Toronto，2011年遷轉來台灣，歷任總編輯有李勤岸、蘇正玄、張秀滿、葉國基、廖瑞銘等。《台文通訊》是海外台語文學運動上重要ê刊物。鄭良光tī創刊號用「火母」款式ê會號講chit份刊物tio̍h扮演「火母」ê角色來thn̂g台灣語文ê香火。伊ê宗旨是chhui廣台語白話字、台語書寫hām台灣語言ê民族主體意識，文字用漢羅lām寫為主。1992年底tī台灣成立「台灣總連絡處」，由陳豐惠做台灣總連絡人。《台文通訊》間接促成國內專業文學雜誌《台文BONG報》ê設立。1997年，《台文通訊》ê台灣發行工作交基金會負責，2011年，編輯mā移交hō͘基金會處理，2012年有得著國立台灣文學館「全國優良文學雜誌補助」。
