台語文運動佇國家語言發展法通過了後，已經進入新的階段。新的階段，需要新的思維。台語人敢準備好矣？佇遮有二个方向，咱逐家友志作伙來參詳：
一、新觀念
(1) 『不割席、不篤灰、不指責』
咱敢有感覺台語運動的朋友一開始感覺真ma-chih，後來soah發現「伊予政府買收去矣，soah攏無敢講話」，抑是「伊怎會chiah無理性，衝kah無斬無節，傷超過啦」(這是兩種相對的思維)？自按呢，朋友漸漸無來去。其實，這種狀況毋若kan-na台語，佇所謂的「台派」內面也是真chia̍p發生。
「只要毋是朋友的攏是敵人」和「只要毋是敵人的攏是朋友」聽起來蓋親像，總是這是2種完全無仝的思維方式：頭一種會予路愈行愈狹，後一種予門愈來愈開。
天下雜誌佇「香港49日 危城終局？反送中運動來到臨界點」這篇文章內面，分析這遍香港的「反送中」運動是按怎會引起遮濟人的響應。主筆講「運動沒有中心領袖，(…)，每個參與者(…)參與感與歸屬感(都)極強，人人自己尋找角色，在自己的位置上「盡做」這是這遍運動會chia成功的2大因素之一。
香港人是按怎做會到neh? 這遍香港反送中運動的六大口號就是「不受傷、不流血、不被捕、不割席、不篤灰、不指責」。頭前三个對抗警察的口號莫論，後面三个口號攏是提醒家己人「毋通切割，毋通懷疑家己人，毋通箭頭指向家己人」，鼓勵逐家佇家己的位置互相配合 – 衝的體現運動的意志，後面的負責爭取社會溫和多數的支持。
台語運動beh成功，愛予較濟(甚至視台語無啥會曉講的/對台語是啥完全無概念的)人加入，予用台語變做是社會主流。所以「按怎對待戰略方向仝款，戰術方法看起來soah差真濟的友志」，和「真無概念，總是想beh加入的人」會是關鍵。對頭前一種來講，「莫相罵/互相攻擊」；對後面一種來講，「莫做台語(文)糾察隊」這攏是真重要的關鍵。
(2)塑造台語的形象
行銷就是共產品和一種正面的形象連結起來，予大眾看著這種產品，就想著這種正面的形象。台語往過因為政府的打壓，造成形象無好。佇新時代，咱愛想辦法予社會大眾對台語的印象轉作正面。
另外，予台語有錢通賺嘛是重要的。這道理確實通人知，總是按怎才做會到？這需要逐家來討論。
二、新方法
(1) 徛佇對方的立場想，替對方解決問題
二種對立的觀念，造成的結果是按怎？
「啥人做總統/部長攏仝款啦」 v.s. 「Beh按怎予總統/部長肯支持」
「遮公務人員攏無效啦」 v.s. 「Beh按怎予公務人員嘛肯動起來」
「民眾攏kan-na喙講講的niâ啦，袂真正去做啦」 v.s. 「Beh按怎予逐家想欲來學/落功夫」
咱愛徛佇對方的立場，替對方解決問題，人才會願意配合 – 這是弱勢者必要的辛苦。
代誌beh成就，替別人設想，忍耐家己的性地，攏是必要的關鍵。
(2) 一步一步來，tāu-tāi-á改變大眾/關鍵人物的觀念
社會真正的進步，是予100个人攏進一步，毋是一个人向前100步。弱勢所以是弱勢，就是和社會大眾的「主流思維」無仝。社會運動就是beh改變大眾的觀念。總是這無hia簡單，嘛毋是一時，有時hāⁿ傷大步顛倒予對方/社會大眾會驚，造成反撲，顛倒造成運動的倒退lu。
(對英譯/網站開始，毋是一擺就beh動中文名/路牌/門牌 – 路名地名, 語言名稱)。
(3) 莫退出，退出就予koh khah bái的人提去!
做運動會當堅持真久的人，大部分攏有一種『道德清氣相』，也就是無想beh予家己和「無清氣」的代誌/事物/觀念產生任何的關聯。一方面來講，這當然是一種避免家己受著對方無好的影響的做法。總是另外一方面來講，咱若真簡單就共關鍵的位置讓出來，按呢，反對的人是毋是輕輕鬆鬆就會當揣就和伊想法相偎的人來接這个關鍵位置leh？「政治就是資源的分配」，無佇這位，就無法度分配相關的人事/資源，按呢台語的勢力是毋是愈來愈細？咱佇hia，可能kan-na會當有60分的進展，咱若離開，換一个反對的人來，可能會變作是「負60分」。按呢對整體運動的影響，顛倒是不利的。
毋若家己，對政府的態度也是按呢。彼時蔣偉寧部長落台，真濟台語界的朋友攏真歡喜，講伊應該。總是佇hit幾年的教育部長內面，蔣部長其實是相對來講對台語上友善，嘛上願意kap台語人溝通的。
這馬的政府嘛是按呢。逐家罵總統、罵部長、罵政府，最後共罵kah in選無著，結果國家的資源落佇反對台語的人手頭，提國家資源來反對台語，按呢敢有較好？
按怎對規个運動較好，莫予一時的情緒牽leh行，嘛是台語運動者重要的修行。
(4) 盡量招新人加入
逐家愛盡量招有興趣的人作伙來做台語。加giú一个人，毋是kan-na一个人，連伊厝內的人、親情、朋友、同事攏可能會受伊的影響。
頂面就是我的一寡想法，和友志作伙來參詳，向望共同創作台語的新未來。
沒有留言:
張貼留言