歡迎大家坐hiah 遠ê飛機來到洛杉磯Lomita 這個小所在參加第23 屆世界台語文化營.
咱世界台語文化營頂遍佇南加州舉辦已經是23 冬前ê代誌--a, 五十 外位台灣草根台語文運動者kap70 幾位加拿大, 日本, 德國, 美國各城市來ê台語文化支持者, 自費tī風颱天坐飛機來到南加州Irvine 市, 參加第二屆台語文化營. 彼年咱記念公開承認家己是台語文盲ê蔡正隆博士, 將伊所發起 ê Houston北美第一屆台灣語文營, 追認做第一屆世界台語文化營. 台語文營改名做台語文化營雖然干焦加一字, 但是意義大, 就是咱決意欲行出台語文運動ê 同溫層, 結合各行各業tùi台語文化有心ê 人, 做伙來起造台灣文化ê 主體性.
第二屆 台文營ê 主題是促進正規化ê台語文教育, 咱23屆ê主題累積過去這20 幾年ê 經驗, 漸漸了解推行正規化台語文教育chē-chē困難, 是因為台灣家長ê價值觀已經被殖民者國語政策壓嚴重扭曲. 所以咱這屆選用 世界文化交流/台灣文化轉型正義及復興 做本屆台文營ê 主題, 期待m̄-nā 會當幫贊台灣台語文教育ê正規化, 嘛仝時會當擴展台語文運動ê境界.
今年拄好是中國國民黨接管台灣七十年, 佇這三代人生命ê時間,台灣社會經歷228大屠殺, 白色恐怖, 38年久ê戒嚴法及文化滅族ê 政策, 台灣人ê心靈感染著Stockholm Syndrome (斯德哥爾摩症候群) , 認同外來壓迫者ê文化, 下意識接受家己是二等國民; 有耳無嘴, 自認語文能力低, 致到就業升學競爭力不如”國語”家庭. 根據中研院張茂桂ê調查, 台灣人ê年平均家庭收入比外省人低20%. 文化上, 國語政策造成本土語言ê社會語言地位愈來愈低, tī正式公開場所毋敢用母語表達家己ê意見, 家庭親密關係嘛受影響. 台語族群講ê「台灣國語」被天龍文化恥笑, 被堅持使用台語ê台灣人怨嘆.
好佳哉, 經過咱幾十年ê拍拚, 2018年12月立法院無異議通過國家語言發展法, 台語電視台頻道嘛爭取著第14頻道, tī 今年7月初1開播. 這是咱達得通歡喜ê代誌. 毋過, 台灣各語言滅種ê趨勢敢有法度轉變? 台語族群佇影視頂ê形像敢會因為台語台ê開播就會得著改善？遮ê 問題咱無拍拼恐驚袂自動解決. Che需要台灣政府落實有轉型正義性質ê文化政策, 用過去推行”國語”政策ê預算及編製來推行正規化ê台語文教育, 製作優質ê台語節目及文化活動. Che嘛需要民間ê 力量來督促及配合, ah 咱這個台語文化營就是展示咱民間力量上好ê機會.
希望咱台語文化營會當愈辦品質愈高, 用按呢來提高台語族群ê自信心及自尊心. 欲辦優質ê文化活動需要結合表演藝術, 行銷, 科技, 募款, 公關等各種無仝ê人才. 咱這屆ê 參加者佇各人ê專業領域攏是一流—--ê； 有上優秀ê台語文學小說劇本作家, 編劇, 劇場導演,專業台語配音, 醫學,電腦工程師,表演藝術, 政治家, 社會運動者, 台文系學院教授等各方面ê人才. 咱利用這屆台文營, 互相了解, 互相學習, 用卡濟時間來聽來欣賞無仝專業領域無仝ê想法, 建立同志中間好ê關係, 形成一個台語文化ê人力資源網路, 來辦優質ê台語文化活動, 復興台灣文化.
文化交流嘛是咱這屆文化營ê主題之一. 世界文化交流是吸收現代文明進步思想上好ê方法. Tiàm美國第二大都市大洛杉磯地區舉辦世界台語文化營, 是文化交流ê好機會. 咱有特別安排公視台語台tī 營隊結束了後拜訪美國主流 KCET公共電視台. KCET ê公關主任及節目部主任會親身接待咱台語台代表, 討論以後合作ê機會.
除了kap美國文化交流, 咱內部無仝領域, 無仝路線之間嘛需要互相了解, 諒解, 甚至欣賞無仝 ê想法kap 策略. 咱台文營內部ê 文化交流, 會hō͘ 咱台語文化運動ê力量閣卡多元, 閣卡豐沛. 咱拍開心內ê 門窗, 用歡喜感謝ê心情互相歡迎, 享受咱兩暝三工ê 團隊生活, 做伙來思考思考台灣文化轉型正義及復興ê 基本價值及行動策略.
為著台語文運動ê普羅化, 咱決定欲開始頒發「台語文化貢獻賞」, 邀請佇台灣社會有一定ê知名度及影響力ê政治家抑是藝界,運動界明星來做推廣台語文化ê大使. 經過嚴格ê挑選過程, 阮一致認為周清玉前縣長是上適當ê人選. 感謝周前縣長願意接受這個有功無賞拍破愛賠ê 賞, 做台語文化大使, 承擔這個艱難, 意義重大ê責任.
感謝鄭麗君部長用心錄影,恭喜23屆世界台語文化營開幕. 相信因為有你, 台語文化活動ê 品質會繼續提昇, 文策院主導ê文化內容產業一定會當扮演台灣文化復興火車頭ê 角色.
感謝蔡英文總統,特別撥時間錄影勉勵, 台灣ê 語言地圖及選舉投票地圖相疊相對, 蔡總統chhoā 頭講台語, 是顧台灣上有效ê 策略. 嘛借用這個機會感謝你tī洛杉磯過境ê國際場合使用台語發言, hō͘ 阮感覺著做台灣人ê 尊嚴.
感謝台灣文化部補助台灣參加者部份ê旅費, 感謝陳文成教授記念基金會kap台灣羅馬字協會全額補助六位四十歲以下ê台灣語文運動工作者, 感謝光鹽傳播協會為咱備辦營隊ê伙食及歡迎晚宴, 感謝白鴒鷥團契/Christine’s創意藝術表演團隊為咱做報名接待工作及籌備晚會節目, 感謝台灣歌仔戲班劇團為晚會提供精彩ê節目. 感謝南灣台灣基督長老教會免費提供場所. 感謝南加州教授協會協辦. 感謝美國台灣人聯合基金會提供財務及文化交流公共關係ê協助.
最後著愛特別感謝出錢出力無求名利ê幕後支持者, 無恁ê鬥腳手, 咱台文營無法度完成.
希望初次來美國ê 朋友營隊結束了後, 順soà 遊覽有多元精彩流行文化ê洛杉磯市,咱接待組有為大家準備幾個自由行路線. 有趣味ê 人請參考大會手冊內ê資料, 自由選擇適合ê 行程.
這屆世界台語文化營籌備ê 時間真短, 難免會有無周至ê所在, 希望咱後屆會當提早準備, 愈辦愈好, 將這個美好ê 傳統繼續傳落去.
鄭良光 23rd 世界台語文化營召集人
主辦單位：台灣羅馬字協會、美國台文通訊、加拿大Toronto台灣語文中心
協辦單位：光鹽傳播協會、美國陳文成教授記念基金會、南加州台灣人教授協會、Christine’s 創意表演藝術工作室
指導單位：文化部
沒有留言:
張貼留言