海內海外台文運動回顧kap現狀：結論-陳雷(吳景裕)

第一為啥物回顧？ Hō͘咱了解近代台文運動 ê本質,ùi tó位來,向tó 位去,為啥物台文運動. 而且提供一个互相熟似 ê 平台, 知影啥人teh創啥,加強連繫合作.

第二特別 beh 數念3位近代台語運動啟蒙 ê先輩. 王育德教授,伊tī 60 年代開創台灣語文 ê 理論基礎, 頭一个為台灣語文做明確 ê 定義,定位. 鄭良偉教授 ùi 70年代開始台文運動拍頭陣 ê 行動, 寫論文,出版台文冊,發展電腦軟體,開課教台文種種.攏是hit个時代差不多無人想會到ê代誌.蔡正隆博士自認是母語ê文盲,創辦第一屆台文營,用伊人生最後洗腎帶病ê 2 冬全心推sak台文運動.因為這3位先做輩 ê眼光kap理想, 90 年代大眾 ê 台文運動chiah來出世.王育德教授,蔡正隆博士已經過身.鄭教授身體無tú好, 三人今 á 日攏無在場,來看tio̍h 咱繼續𪜶ê理想 teh拍拚.咱借這个大會深深感謝𪜶.

第三咱有一个構想：考慮設立一个「 台語文運動資料庫」.目的第一 收集整理近代台文運動資料.第二介紹現此時台語文運動ê人力資料,加強互相連繫合作.甚至會使繼續這回台文營鬧熱ê Line group, kā伊擴大,變做一个「台語文運動」ê平台, tī這个大會了繼續運作,互相連絡.