台語文學過來發展 ê 範圍真chē, 咱chit-má來討論台語文學外譯kap台語口講文學這二項.
A.台語文學外譯：
目前已經有英語, 日語, 越南語kap荷蘭語 ê 翻譯. 外譯有2个困難 ê 喉kha̍h. 也就是外譯者 kap 出版經費 ê 限制. 網路直接出版（Online direct publisheng）會當減輕出版經費用 ê 負擔,
介紹 網路出版上大公司Kindle Direct Publishing (KDP).
1.作者經過KDP直接tī Kindle 電子冊（Kindle e-book )網站出版.
2. KDP有專業人才kā作者ê電子檔案改做電子冊型式上網( 需要付費）.讀者會當tī 網站買電子冊,或者紙版冊.無數量限制.
3. 作者保留版權.
4. Kindle照冊ê銷量付著作費（Royalty ）.
5. 經過KDP出版ê冊tī Kindle Amazon 網站銷售.
6. 出版費用比傳統紙面冊出版加真俗.
7. KDP 有英語,日語,印度語（Hindis）ê 出版.
8. 網址：kdp.amazon.com
台語文學荷蘭語翻譯：
翻譯者：Joren Pronx （阿仁）, 語言學家. 荷蘭萊頓( Leiden)大學漢學系 .
翻譯作品：短篇小說 Thâi狗.
原作者：陳雷
發表：Krant Study Association Sinology Leiden
譯者感想：紅毛阿tok á對台語文學習kap翻譯ê一寡感想
各位朋友逐个好，
我是一个荷蘭出世、熱愛臺灣kap臺語ê阿tok á,幾冬前頭一擺去臺灣學華語 ê時，我開始對臺語有興趣。彼當時我干焦有學發音、臺羅kap一寡詞爾,無蓋濟.轉去荷蘭了後，tú好佮一位tī荷蘭讀研究所ê臺灣人有熟似.伊臺語講著真輾轉,讀語言學,所以我隨後就kā拜師做伊ê學生。
彼陣阮兩个每禮拜會面,kā伊問真濟代誌臺語按怎講,荷蘭語ê in、op、onder臺語按怎講咧？內底、頂koân、下跤. kap華語ê差別夭壽大！後來我也試看覓用臺語kap伊開講。彼時因為我mā會曉講淡薄a華語,所以若tú tio̍h m̄知影臺語愛按怎講ê詞彙,規氣tō kā華語相對ê字直接用臺語念出來,有時台語kap華語ê講法仝款,有時完全無仝.所謂faux amis mā bē少。是按呢我發現講,台語的詞kap華語ê無仝. 為tio̍h進步,提升我ê台語能力,我開始拍拚讀台文.無論啥物語言抑是你ê程度有偌koân,你若讀文學作品,tō攏會tú tio̍h新詞,而且攏mā有語境,有一个例句,所以會koh khah好學。
台文kap別種語文無仝ê是,雖罔chit-má教育部有標準化台閩漢字ê用字,但是幾百冬來台文作者愛按怎寫攏由在—in,tō是這个緣故,讀台語文比讀荷蘭文、華文抑是Swahili文koh khah困難,也koh khah趣味.寫台語文ê作者會當按in所使用ê字分做三陣：有个作者主張全部攏用羅馬字寫--這款作品百偌年前較濟,chit-má soah kán-ná khah罕得看會tio̍h;有ê主張kā漢字參羅馬字濫做伙寫--所謂 ê「漢羅」.這款ê原a算bē少；第三陣是全部攏寫漢字ê──這陣lú來lú濟人會按呢寫.我看彼的確是因為chit-má教育部ê推薦用字ê關係。幾年前tiàm台灣渡假ê時陣,有買一本2006年府城舊冊店出版ê台語文學選,名號做「咱阮」,內底有幾lōa篇散文、小說和詩.有个干焦有漢字,有ê是漢羅ê彼種,有ê詩甚至到五pha攏寫羅馬字。
讀無規定漢字寫ê台文,上困難ê tō是有時ioh b ē tio̍h作者寫這字到底是beh寫啥物詞leh，這應該然是因為我ê台語能力猶無啥好,而且漢字無標準化,字典mā chhōe bē tio̍h。對這个角度看,寫漢羅是有優點,漢字若無的確,tō會使寫羅馬字.猶m̄過讀者若m̄知影這个羅馬字寫ê詞是啥物意思,尤其是所謂的「擬態詞」(ideophones) 參「擬聲詞」(onomatopoeia)ê發音kap羅馬字拼法會隨人無仝,m̄ tú好字典mā chhōe無。
所以對我一个學台語ê紅毛阿tok á來講,標準化對學台語、讀台語文kap翻譯上蓋有幫贊。感謝逐个予我一个機會tīchia表達我ê意見.我看上重要ê tō是hō͘koh khah濟ê朋友有機會學著台語、讀著台語文、享受台語文學ê美麗──M̄但是台灣朋友,外國朋友mā愛有這个機會, mài hō͘台語kap台語文學pháng去。在此mā特別感謝陳雷老師替我tī chia表達我ê意見。
蒲耀仁，Joren Pron
B 台語文學ê新市場 口講文學 ：廣報劇, 拍嘴鼓
世界上真chē文化有傳統ê 口講文學. 比喻講, 阿拉伯文化有豐富ê傳統口講文學 Hakawati. 念詩（酒詩,拍獵詩,愛情詩...） 講故,講小說, 講劇 是真有地位 ê 專業.
咱台灣也有傳統 ê 口講文學, 拍嘴鼓, 流行歌種種 ：不過𪜶 tī文學 ê 地位時常hō͘人看無. 但是𪜶對台語生thòaⁿ ê 貢獻真大：戒嚴令時代流行歌上尾消聲.解嚴了上早回聲. Tī台語文學完全無去 ê 期間, chhun 伊iáu teh 喘氣.
台文運動應該盡量利用口講文學 ê 優點： A.任何個人會使寫, 會使念 B. koh會使利用現代資訊網路（You tube 種種 ) 傳播出去.會當傳播真緊真闊. C. 口講文學對台語本身語詞,語法 ê 演化效應大koh緊.會隨時kā社會口語 ê 變化直接輸入書寫文學.
結論：口講文學是台語運動發展好 ê 新市場.
拍嘴鼓廣播劇 『河 a 轉來去』切一小節做例：
所在:台南到台北上北火車頂 . 人物:人客一(生理人,四十出頭歲) ,人客二(煌a ,生理人,三十出頭歲)
( 背景：火車teh走é聲) 人客一(哺檳榔, théh一粒hō͘煌a )
… che細漢河a作兵一冬轉來,人teh等伊 ah ,槍pöng-pöng leh, tō toän死, tàn ti草埔a , … …人去chhiāng著,好好猶未爛, khioh去驗屍,破腹( pak ) théh槍chi出來,開六千, khǹg到hit日十七好日才燒.叫粿a作一塊薄板a ,按呢也開六萬幾, 買hit個甕a四千,去街a買一領siakchuh , 一雙皮鞋二千kho。Hit日ti hia一晡,燒十幾個,人去地下室領出來.九點半入去,十一點半出來,一堆灰hu , khàu pē ah , he甕a siuⁿ細, té bē去,用一支鎚a mau-mau hám-hám ,幹恁娘, he人敢有靈魂？ 你敢beh信？煌 a ,你看, he人燒出來是倒直直neh ,腳tâng骨kiu來頂身, ti頭殼邊hia。 Che kap土葬無像,幹恁娘,人teh計較啥？ !火葬二點鐘一個,一晡hia看十幾khū , ah六口排一排,你看一日燒幾khü ?火葬場一個月燒幾百囗?人一生tú好chhun hia niå , chhun hit个甕a niå , ah過三個月,四個月人數念一擺…. Tī ê人teh數念,去é敢猶會？……..
(火車tell走é聲)
沒有留言:
張貼留言