摘要
台灣人、台灣民族欲行位佗位去？欲按怎佇世界舞台徛起來？上好的一條路道是：建立台灣民族國家。代先，探訪台灣民族的前世今生，認清民族 (Nation) 是：族群佇「政治、經濟、文化」活動裡，所產生的「命運共同体」；佇民族國家 (Nation State) 起造運動裡，探討這「三位一体」的現狀是啥？台灣政治大柱，已經誠有民主化、言論自由，台灣經濟大柱嘛栽栽栽也，所致，台灣政治經濟這個「硬實力」是有夠勇健矣。文化是民族靈魂，「軟實力」的「文化魂」掌控政治經濟「硬實力」的航向；雖罔經過二擺民進黨執政，卻是夠今也，台灣文化大柱猶是軟腳蝦。結局，台灣國家機器煞是：「無魂有体親像稻草人」，運行起來煞離離落落；甚至，中國文化幽靈橫行、「家神拜外鬼」，拼「台灣政治經濟」也，唔知為誰咧拼咧？外鬼侵門踏戶，國安強欲崩山。「語文」是「文化」的媒介載体，而「語文思維」是文化的「魂中之魂」也。中國國民黨政權殖民統治70外年，一直下毒：「獨尊華語文，壓制南島語、客語、台語。」誠不幸！南、客、台的台灣語文煞攏軟惜惜！辜不終，說起華語，佫夆訕笑是：講甲阿里不達，煞失去自信、尊嚴。用家己的族群母語，上界有自信、尊嚴。濟濟歷史參文化史實，可實證復興「台灣語文魂」，誠實是起造台灣民族國家 (Taiwanese Nation State) 的重大「文化轉型」工程。
就台語文運動本身來講，彼是為著落實台語族群的台語平等權。因為台語族是佔多數的族群，所致，就整個台灣「文化轉型」的大工程來講，台語族有責任、幫贊客語文參南島語文的復興。各族群語文運動過去一路行來，充滿著矛盾參挑戰；欲按怎繼續順利行落去，誠實是咧考驗台語族的知慧。倒轉來講，台語族若是唔敢堅持、積極爭取家己的台語文權益，道會失去少數族群對台語族的尊敬，煞嘛失去多數者台語族應該有的領導權參責任，按呢來，對整個台灣「文化轉型」運動是不利的。另外，文化、語文轉型靠咱每一個人，而條條道路攏通台灣語文的羅馬；就個人的專長及興趣，選一項，自信、安祥、快樂、浪漫行落去。就我個人來講，76歳矣，我選一項：專心書寫台美人小說，將北美洲一世代台美人有血有目屎的奮鬥史跡，以台語文學記錄落來。這本《相思蟬》台語小說集是初步的成績，嘛是送互各位的小小禮物。來，咱作伙來拍拼也。
沒有留言:
張貼留言