Tâi-Oa̍t Bûn-ha̍k Sè-kí Kau-liû Pò-tō 台越文學世紀交流報導-Chiúⁿ Ûi-bûn (蔣為文)

Tâi-oân Bûn-ha̍k Kok-chè Kau-liû Siong-koan Chu-liāu

台灣文學國際交流相關資料

[Bûn-chiuⁿ 文章2]

Tâi-Oa̍t Bûn-ha̍k Sè-kí Kau-liû Pò-tō

台越文學世紀交流報導

Chiúⁿ Ûi-bûn

Oa̍t-lâm kok-ka bûn-gē-chióng tit-chióng-chiá Tân Lūn-bêng (Trần Nhuận Minh) tī 10 goe̍h 27 hām 28 nn̄g kang hun-pia̍t tī Kok-li̍p Tâi-oân Bûn-ha̍k-koán kap Chê Tang Si Sià pān Tâi-oân-pán sin-chheh hoat-piáu hām bûn-ha̍k kau-liû-hōe. Chit-ê oa̍h-tōng ê ì-gī chhiūⁿ Gio̍k San hiah koân, ē-sái kóng sī Jī Chhì Chiàn-āu tē it pái ū Oa̍t-lâm kok-ka-kip si-jîn ê chok-phín hông hoan-e̍k chò Tâi-gí hām Chi-ná-gí koh tī Tâi-oân chhut-pán ê le̍k-sú-sèng tōa tāi-chì.

Chit pái oa̍h-tōng ê chú-pān tan-ūi sī: Tâi-Oa̍t Bûn-hòa Hia̍p-hōe, Tâi-bûn Pit-hōe, Tâi-oân Lô-má-jī Hia̍p-hōe, Sêng-tāi Oa̍t-lâm Gián-kiú Tiong-sim, A-se-a Kok-chè Thoân-pò-siā. Ha̍p-pān tan-ūi sī: Kok-li̍p Tâi-oân Bûn-ha̍k-koán, Chê Tang Si Sià (齊東詩舍), Chhàn-lān Sî-kong Chheh-tiàm.

Góa hām chok-chiá Oa̍t-lâm si-jîn Tân Lūn-bêng sī tī 2015 nî tī Oa̍t-lâm kí-pān ê A-thài Bûn-ha̍k Lūn-tôaⁿ lìn se̍k-sāi. Hit chūn i sàng góa 1 pún i ê si-chi̍p. Góa bōe-chēng tha̍k oân tō tùi i ê si chin ū ìn-siōng koh o-ló tak-chi̍h. In-ūi i chhin-sin chham-ú kòe Oa̍t-lâm tùi-khòng góa-lâi chèng-koân ê bîn-cho̍k to̍k-li̍p ūn-tōng, chok-phín lāi-té lóng sī móa-kîⁿ ê tùi kò͘-hiong Oa̍t-lâm ê thiàⁿ-thàng, jîn-seng ê thiat-lí, hām chiàn-cheng ê hoán-séng. Chit khoán ê it-chi-páng ê chok-phín choa̍t-tùi ta̍t-tit Tâi-oân tho̍k-chiá hó-hó-á him-sióng. Só͘-pái lán te̍k-pia̍t kéng 37 siú i ê si-chok, hoan-e̍k chò Tiong-bûn hām Tâi-bûn, ǹg-bāng chit pún chheh ē-tàng tài-tōng Tâi-oân hām Oa̍t-lâm lióng kok chi-kan koh khah chē ê bûn-ha̍k kau-liû.

Sui-bóng Tâi Oa̍t chi-kan ê keng-bō͘ óng-lâi chin chia̍p, m̄-koh bûn-ha̍k ê kau-liû soah iáu chin iú-hān. Chin chē Tâi-oân-lâng m̄-bat Oa̍t-lâm bûn-ha̍k, sīm-chì kiò-sī Oa̍t-lâm bûn-ha̍k sī Tiong-kok bûn-ha̍k ê chi-liû. Kâng-khoán, bē-chió Oa̍t-lâm-lâng mā m̄-bat Tâi-oân bûn-ha̍k, tiāⁿ gō͘-hōe kā chāi Tâi-oân ê Tiong-kok lān-bîn bûn-ha̍k tòng-chò sī Tâi-oân bûn-ha̍k ê tāi-piáu. Tio̍h sī chit-ê iân-kò͘, lán te̍k-pia̍t kui-ōe chhut-pán chit pún to̍k-te̍k ê Oa̍t-Tiong-Tâi saⁿ gí si-chi̍p “CHIÀN-HÓE JÎN-SENG” thang ín-chhōa khah chē lâng lâi chò Tâi Oa̍t bûn-ha̍k kau-liû. Mā chioh chit-ê ki-hōe kā Tâi-bûn siāu-kài khì gōa-kok. 

Oa̍t-lâm si-jîn Tân Lūn-bêng 1944 nî tī Oa̍t-lâm pak-pō͘ Hái-iûⁿ séng chhut-sì, hiān-chhú-sî tēng-ki tī Kóng-lêng séng ê Hā-liông-oan chhī. Oa̍t-lâm kok-ka bûn-gē-chióng tē 2 kài tit-chióng-chiá (2007nî). Bat chò kòe Kóng-lêng séng Bûn-gē Hia̍p-hōe hōe-tiúⁿ, Hā-liông-oan Pò chú-pian téng bûn-gē khang-khòe.

Tân Lūn-bêng chit chōa lâi Tâi-oân, tit tio̍h Tâi-bûn-kài chin tōa ê hoan-gêng hām chiau-thāi. Tī kau-liû-hōe lìn, Tân Lūn-bêng kó͘-lé lán Tâi-bûn chok-ka tio̍h kian-chhî iōng Tâi-gí siá-chok ê koat-sim hām ì-chì. I mā jīn-tēng chóng ū 1 kang Tâi-gí-bûn tek-khak ē chhut-thâu-thiⁿ! Kun-kù Tân Lūn-bêng ê piáu-sī, i ê chok-phín í-keng ū hông hoan-e̍k chò 11 chióng gí-giân, Tiong-bûn pâi tē 8 ê, Tâi-bûn tē 9, Hân-kok-bûn tē 11. In-ūi ū chit-khoán oa̍h-tōng, sò͘-pái in chheng-chhó liáu-kái Tâi-bûn hām Tiong-bûn bô-kâng, mā chiah hoat-hiān Tâi-oân-lâng ê bó-gí sī Tâi-gí m̄-sī Chi-ná-gí.

Oa̍t-lâm tī 1865 nî hoat-hêng tē-it hūn ê Lô-má-jī pò-chóa “Ka-tēng-pò.” Chit hūn pò-chóa iû bat 27 chióng gí-giân ê sè-kài-kip Oa̍t-lâm bûn-hô Tiuⁿ Éng-kì chò chú-pian. Tâi-oân mā tī 1885 nî hoat-hêng tē-it hūn ê Lô-má-jī pò-chóa “Tâi-oân Hú-siâⁿ Kàu-hōe-pò.” Chit 2 hūn pò-chóa hun-pia̍t chhiok-chìn Oa̍t-lâm hām Tâi-oân ê pe̍h-ōe-bûn ūn-tōng, pí Chi-ná ê 1919 nî Gó͘ Sù ūn-tōng koh khah chá!

Lūn chin kóng, tōa-to-sò͘  Tâi-oân-lâng ê bó-gí sī Tâi-gí. M̄-koh, chū 1945 nî chiàn-āu Chi-ná Chiúⁿ Kài-chio̍h chèng-koân chiàm-niá Tâi-oân liáu iōng to̍k-chhâi ê si̍t-bîn thóng-tī chhiú-tōaⁿ pek Tâi-oân-lâng o̍h Chi-ná-ōe hām Chi-ná bûn-ha̍k. Chō-sêng bē-chió Tâi-oân chok-ka hông kā chi̍h soah sit-khì iōng Tâi-gí chhòng-chok ê lêng-le̍k. Tī chit pún si-soán lìn, lán te̍k-pia̍t kā chok-phín hoan-e̍k chò Tâi-bûn iáu ū 1 chân chin chhim ê ì-gī, tio̍h-sī beh ha̍k-si̍p Oa̍t-lâm-lâng kian-chhî iōng Oa̍t-lâm-ōe chhòng-chok Oa̍t-lâm bûn-ha̍k ê cheng-sîn! Mā beh ho͘-èng Tâi-bûn Pit-hōe ê chú-tiuⁿ: Tâi-oân bûn-ha̍k tio̍h-ài iōng Tâi-oân bó-gí chhòng-chok! Tiong-kok Pak-kiaⁿ-ōe choa̍t-tùi m̄-sī Tâi-oân-ōe!

Beh liáu-kái khah chē “CHIÀN-HÓE JÎN-SENG” chit pún si-chi̍p ê lāi-iông, tho̍k-chiá ē-sái khì bang-lō͘ chheh-tiàm Phok-kheh-lâi (博客來), PCstore ia̍h Kim-chio̍h-tn̂g (金石堂) bé.