用台語講塔羅牌-Ngôo Huī-tshing(吳蕙菁)

我是A-tshing，大部份ê時間攏佇厝內用電腦做工課、寫文章，會當做ê代誌無濟mā無大，希望會當加減影響我身軀邊ê人。

做一套全台語ê祝福牌仔

我ê其中一个工課是替人讀牌仔的塔羅師，像這款khah西方ê服務，逐家敢有想過講會當用台語來進行？我定定報名各種市仔去排擔，mā歡迎人客用台語kap我討論in ê困擾，結束ê時，我會予人客抽祝福ê牌仔。

M̄-koh這種牌大部份攏是英語ê，準講有台灣人做ê，mā攏是寫華語。一方面teh予人祝福ê時koh ài翻譯真費氣，另外我mā希望予講華語ê人客mā有機會聽tio̍h台語思考ê祝福、看tio̍h用台語文書寫ê祝福牌，所以我希望今年底會當家己來設計全台語ê祝福牌。

用台語ê理路，來寫予逐家ê祝福。

我ê塔羅面冊頁 荒蕪日晝：https://www.facebook.com/JTthahlo/

書寫，原仔ài有人來交流

若欲看台語文章ê時陣，你攏會去佗位看？

除了雜誌kap面冊社團以外，我今年開始佇「方格子」寫全台語ê文章，這是一个提供作者開放讀者贊助ê平台，你會當設定hőng訂閱，iah是鼓勵讀者照in家己ê意思來孤一改贊助，mā會當全部免費當做一个blogger來經營。

會佇遮刊文章，是因為我希望會當有koh khah濟平台來予無teh看雜誌kap參加社團ê人有機會讀tio̍h完整ê台文。

方格仔是台灣人設計製作ê網站，大部份攏是華語文章，若是會當揣tio̍h koh-khah濟人願意來這个平台用台文寫生活、電影、政治，iah是逐個月綴方格仔ê主題來寫作、交流，變做一个箍仔，甚至是一陣人做伙討論主題來寫，成做一種小型ê寫作會，對無慣勢看雜誌、想beh寫台文但是刊佇面冊罕得有人回應ê少年人來講，應該是袂䆀ê方式。

這má沓沓仔teh揣有興趣ê朋友。

我ê方格仔：https://vocus.cc/user/@ootsi

用「台員人」取代「Hô-ló人、台灣人」

開始講台語、學台文了後，拄著siōng大ê問題就是真濟人會唱聲講「憑什麼你叫台語？」、「台語就是閩南語」，因為「台灣」這兩个漢字ê意義改變，有真濟原底就對台語族群有意見ê人，就會按呢來為難，ài阮妥協。

「台灣人」這三字，uì解說一種語族，變做解說蹛佇這塊土地ê所有人，有真濟少年人攏會因為無了解「你是Tâi-uân-lâng，哪會袂曉講Tâi-uân-uē」真正ê意思來感覺受傷，為tio̍h這種傷，討論ê時定定會親像啞口食苦瓜，有喙mā m̄知beh按怎講。 

後來我對網路揣tio̍h「台員人」ê寫法（面友夏途島ê想法）。

這个漢字詞比「台灣」koh khah倚原來ê音，而且kap iah未學台文ê朋友mā會當真緊來了解彼句「你是Tâi-uân-lâng，哪會袂曉講Tâi-uân-uē」是teh講咱ê語族，m̄是講所有蹛佇台灣ê人，mā m̄免看tio̍h無仝人就講無仝名（閩南、Hô-ló、台語人…等等）所致我就一直用到這má，mā向望koh khah濟台員族群ê少年人會當做伙kā父母話抾轉來，繼續來替台語文拍拚。