台灣社會對兩蔣,黨外,到今仔日民進黨執政, tī政治上假ná有大進步, 毋過台灣文化ê主體性到今猶無法度確立. 台灣民間並無因為民進黨百分之百ê執政有出頭天ê感覺, 反轉猶充滿被剝奪感, 感覺家己猶閣是二等國民, 對現狀充滿不滿,對政治改革ê速度失望, 甚至是不信任. Che問題出tī tó位? 咱欲用語言文化ê角度,來探討問題ê根源到底出tī 佗位? 政府kap民間會當共同做啥來面對遮ê 問題？ 台灣國家正常化時間猶未到ê時, 檢采咱會當先來努力台灣文化ê正常化. 理論上, 民主體制下有理想ê 文化就會產生理想ê 國家. 最近蔡政府頒佈國家語言法, 成立文策院, 公視台語頻道, 是台灣決心欲對殖民威權文化行出來好ê開始, 毋過che敢已經是too little too late?
Kap世界各殖民政府仝款, 兩蔣政權為著欲確保in少數殖民者ê政治經濟利益, 代先是用228武力鎮壓, 閣落來就用國語文化政策, 消滅台灣語言, 消滅台灣人ê民族文化認同, hō͘ 台灣ê 精英甘心為殖民者ê利益來服務. 刣靈魂—ê 比刣身軀—ê 閣卡可怕. 有形ê 228屠殺, 台灣人看會著, 後代人知影thang反抗. 無形ê語言文化屠殺, 慢慢仔改變台灣人ê文化基因, 刣台灣人ê靈魂. 莫怪咱真濟親人朋友不知不覺失去台灣魂, 甘願做壓迫者ê走狗.
文化創意生命流程（見圖）外圍表示一個文化圈內面影響文化創意ê 四項源頭：活命, 自然, 制度, 文化. 文化創意經過文化工作者ê創作, 文化通路, 消費（欣賞）, 感動, 產生新ê 創意, 閣經過再創作ê 過程, 不斷teh循環, 若無受政治制度ê 干擾, 文化創意就會tī 文化圈內面傳承繼續演進, 形成這個文化圈特有ê文化特色. 若是有政治制度故意來干涉, 控制思想自由, 限制文化創意tī學校教育, 大眾媒體ê 文化產品通路, 甚至是用政策來污染文化環境, 按呢這個文化圈ê 文化毋但無法度傳承kap演進, 顛倒會受污染, 文化基因受破壞, 繼續破壞後代文化ê 健康發展.
受著半世紀以上兩蔣殖民國語政策ê 打壓, 台灣本土文化圈ê 文化基因已經受污染；本土語言面臨斷種ê 危機, 台灣心靈破病, 價值觀受扭曲, 根據美國開業精神醫生林毅夫所寫ê「台灣人受虐性格ê心理分析」, 台灣文化已經患著斯德哥爾摩症後群, 產生族群文化自卑感, 下意識接受二等國民ê 身份, 認同壓迫者, 看輕母語文化, 甘心樂意為壓迫者服務. 經濟上, 因為台灣人受文化壓迫所帶來ê 自卑感, 及國語政策下語言工具使用能力ê 弱勢, 台灣各族群ê 經濟競爭力嘛無公平正義. 根據中研院張茂桂台灣各族群ê 年平均收入, 外省族群比台語族群高20% 以上. 這款無公平正義ê 社會文化現象, 已經引起台灣社會強烈要求落實轉型正義政策. 可惜到今轉型正義ê 訴求, 偏重tī個人財產, 肉體, 生命損失ê 賠償. 對台灣人集體受殖民國語文化政策造成ê 傷害, 猶無文化轉型正義ê 論述.
咱這個「台語文化轉型正義及復興」研討會, 欲來討論台灣文化有受著啥物殖民政權有意ê 污染, 污染ê程度按怎影響著台灣社會正常ê 發展及幸福；以及有啥款方法來清除污染, hō͘ 台灣文化得著復興. 咱邀請著ùi三個國家來 ê 台語文運動者, 陳雷（吳景裕醫生）代表加拿大, 胡民祥博士代表美國, 張復聚醫生（Babuza）代表台灣, 蔣為文教授代表後殖地文化研究, 來做引言人. 希望咱ê 討論會當引起台灣關心台灣前途各界人士ê 注意, 來關心台灣文化轉型正義及復興ê 議題.
沒有留言:
張貼留言