Siăn-pái, pêng-an!(a-Chêng)

Sió-mōe sī Tâi-oân-chhī Tiông-êng tiong-ha̍k 2-nî ê ha̍k-seng Ńg Soat-chêng (阮雪晴). Kin-nî gún Tâi-sú sin-seⁿ Sio sin-seⁿ kiò goán mài kan-na “tha̍k chheh,” kó͘-lē goán sàng sî-kong-phoe, hām éng-chūn ê Tâi-oân lâng ti̍t-chiap lâi kau-liû, hō͘ goán thang liáu-kái tē-1-chhiú ê Tâi-oân sū.

Phian-phian góa “hó-káu-ūn” khì thiu tio̍h Tiong-kok sî-tāi āu-tōaⁿ. Khó͘ ·a! Hāi gún sàng 27 tioⁿ phoe to á-bōe ū pòaⁿ ê lâng hôe. Sio̍k-gí kóng tē 1 gōng, chèng kam-chià hō͘ hōe-siā pōng; tē 2 gōng, siá Tâi-gí phoe hō͘ “Tiong-hoa Tâi-pak sông.” Tông-o̍h kóng ài siá Tiong-hoa-gí lín chiah khòaⁿ-ū, m̄-koh góa kan-na bat Oa̍t-lâm-gí, Ji̍t-gí, chi̍t-sut-á Eng-gí, chi̍t-sut-á Kheh-gí. Tiong-hoa-gí m̄-bat. Gún tông-o̍h bô lâng ē-hiáu Tiong-hoa-gí.

Sió-mōe m̄ sí-sim. Ji̍t-pún sî-tāi siōng-bóe ji̍t ū lâng bat Tâi-bûn, To̍k-li̍p hit kang mā ū lâng bat Tâi-bûn, án-ne Tiong-kok sî-tāi tiāⁿ-tio̍h ū lâng bat Tâi-bûn! Chit tioⁿ phoe lí nā khòaⁿ-ū, góa siōⁿ-beh thiaⁿ lí kóng, hit-chūn ha̍k-hāu to bô teh kà Tâi-bûn, lí sī án-chóaⁿ o̍h ·ê? Tiong-kok sî-tāi beh chò Tâi-oân lâng kám sī chin bô kán-tan? Lí ê le̍k-liōng ùi toeh lâi?

Hó, lí nā khéng kā sió-mōe tàu-pang-chān tàu-khan-kà, chiah lô-hoân lí hôe-phoe. Chú-tê ài ē-kì-tit khǹg “SKK-109.346.24-ńg.soat.chêng,” lí ê phoe chiah ē sàng lâi kàu bī-lâi ō͘! 

Kám-siā.

a-Chêng

2093-10-10 tī Tâi-oân

soatcheng9595@tawa.asia

TUI. Siăn-pái lí nā koàn-sì siá “Hàn-jī,” góa mā khòaⁿ-ū ō͘! M̄-koh gún Tâi-bûn sin-seⁿ kóng goán iōng pún-thó͘ Hàn-jī siá phoe, lín tò jú khòaⁿ-bô? In-ūi Tiong-kok Bîn-chèng-hú hit-chūn kan-na ún-chún lâng o̍h Tiong-kok Hàn-jī?

TUI. Pháiⁿ siau-sit… 2020 nî lán chù-tiāⁿ soán 1 ê khin-sī gí-bûn chèng-gī ê pún-thó͘ gí-bûn chheⁿ-mê-gû chò chóng-thóng…

TUI. Hó siau-sit… Iáu ū lí! Ū lín, chiah ū goán.